8મા પગાર પંચ મુદ્દે નવી દિલ્હીમાં મહત્વપૂર્ણ બેઠક. લઘુત્તમ પગાર, ફિટમેન્ટ ફેક્ટર, OPS અને પ્રમોશન નીતિ પર ચર્ચા, જાણો તમામ અપડેટ એક જ સ્થળે.
નવી દિલ્હી: કેન્દ્રીય કર્મચારીઓ અને પેન્શનરો માટે 8મા પગાર પંચને લઈને ચર્ચાઓને ગતિ મળી છે. 25 ફેબ્રુઆરી 2026ના રોજ નવી દિલ્હીમાં યોજાયેલી નેશનલ કાઉન્સિલ (સ્ટાફ સાઇડ)ની બેઠકમાં કર્મચારીઓની વિવિધ લાંબા સમયથી બાકી રહેલી માંગણીઓ પર વિસ્તૃત ચર્ચા થઈ હતી. બેઠકમાં પગાર માળખામાં વ્યાપક સુધારાની જરૂરિયાત પર ખાસ ભાર મૂકાયો હતો.
કર્મચારી સંગઠનોનું માનવું છે કે, છેલ્લા કેટલાંક વર્ષોથી મૂળભૂત પગાર અને ભથ્થાંની રચનામાં પૂરતા ફેરફાર થયા નથી. આ કારણે 8મા પગાર પંચમાં લઘુત્તમ મૂળભૂત પગાર વધારવો, ફિટમેન્ટ ફેક્ટર સુધારવો અને વાર્ષિક ઇન્ક્રિમેન્ટમાં વધારો કરવો અનિવાર્ય બની ગયો છે.
પાંચ પ્રમોશનની ગેરંટી પર વિચાર
બેઠક દરમિયાન કર્મચારીઓને સેવા દરમિયાન ઓછામાં ઓછા પાંચ પ્રમોશન મળવાની ગેરંટી આપવા મુદ્દે વિચારણા કરવામાં આવી. સંગઠનોના પ્રતિનિધિઓએ દલીલ કરી હતી કે વર્તમાન પ્રમોશન નીતિમાં સ્પષ્ટતા અને પારદર્શિતાનો અભાવ છે, જેના કારણે ઘણા કર્મચારીઓ લાંબા સમય સુધી એક જ ગ્રેડમાં રહી જાય છે.
OPS ફરી અમલમાં લાવવાની માંગ
8મા પગાર પંચ હેઠળ જૂની પેન્શન યોજના (OPS) ફરી અમલમાં લાવવાની માંગ પણ ઉઠી છે. કર્મચારી સંગઠનો માને છે કે નિવૃત્તિ પછીની આર્થિક સુરક્ષા માટે OPS વધુ અસરકારક છે. પેન્શનરોને મળતા લાભોમાં વધારો અને મોંઘવારી ભથ્થાં સાથે સુસંગત સુધારા કરવાની માંગ પણ બેઠકમાં નોંધાઈ હતી.
આરોગ્ય અને ભથ્થાં મુદ્દે ખાસ ધ્યાન
ચર્ચા દરમિયાન CGHS સુવિધા ઉપલબ્ધ ન હોય તેવા શહેરોમાં આરોગ્ય ખર્ચ માટે વધારાની સહાય આપવાનો મુદ્દો પણ સામે આવ્યો હતો. ઉપરાંત ઇન્ટરનેટ અને અન્ય આવશ્યક સેવાઓ માટે ખાસ ભથ્થું આપવા અંગે વિચારણા થઈ રહી છે. સંગઠનોનું માનવું છે કે ડિજિટલ યુગમાં ઇન્ટરનેટ મૂળભૂત જરૂરિયાત બની ગયું છે, તેથી તેનો ખર્ચ ભથ્થા સ્વરૂપે આવરી લેવો જોઈએ.
JCMની મહત્વપૂર્ણ ભૂમિકા
Joint Consultative Machinery (JCM) ભારત સરકાર અને કર્મચારી પ્રતિનિધિઓ વચ્ચે સંવાદ માટેનું સત્તાવાર મંચ છે. 8મા પગાર પંચ માટે કર્મચારીઓની માંગણીઓનું એક સંયુક્ત મેમોરેન્ડમ તૈયાર કરવાની જવાબદારી JCM પર રહેશે. આગામી 10થી 15 દિવસમાં વિવિધ સંગઠનો પાસેથી સૂચનો એકત્રિત કરીને એક સામાન્ય દસ્તાવેજ તૈયાર કરવામાં આવશે.
માહિતી મુજબ, 10 માર્ચે ફરી બેઠક યોજાશે. ત્યારબાદ તૈયાર કરાયેલ મેમોરેન્ડમ 8મા પગાર પંચના અધ્યક્ષ રંજના પ્રકાશ દેસાઈને સોંપવામાં આવશે. આ બેઠકમાં લઘુત્તમ પગાર, ફિટમેન્ટ ફેક્ટર, પ્રમોશન નીતિ અને પેન્શન સુધારા જેવા મુદ્દાઓ પર અંતિમ ચર્ચા થવાની શક્યતા છે.
કેન્દ્રીય કર્મચારીઓમાં આશા વ્યક્ત કરવામાં આવી રહી છે કે 8મો પગાર પંચ તેમની લાંબા સમયથી ચાલી આવતી માંગણીઓનું યોગ્ય નિરાકરણ લાવશે. ખાસ કરીને પ્રમોશન અને પેન્શન સંબંધિત મુદ્દાઓ પર મોટા નિર્ણયો લેવાઈ શકે છે, જેના પ્રભાવ લાખો કર્મચારીઓ અને પેન્શનરો પર જોવા મળી શકે છે.